অসম ক্ৰিকেট সন্থাৰ প্ৰশংসনীয় পদক্ষেপ; প্ৰাক্তন ক্ৰিকেটাৰলৈ আগবঢ়ালে অৰ্থ সাহাৰ্য্য

অলিম্পিয়া প্ৰতিবেদন

অসম ক্ৰিকেট সন্থাৰ মহানুভৱতা। ক্ৰিকেট সন্থাটোৱে আগবঢ়াইছে দুগৰাকীকৈ প্ৰাক্তন ক্ৰিকেটাৰলৈ চিকিৎসা সাহাৰ্য্য। অসমৰ প্ৰাক্তন ক্ৰিকেটাৰ তথা তিতাবৰৰ ক্ৰীড়া সংগঠক আছিফ ইকবাল হুছেইন আৰু আন এগৰাকী প্ৰাক্তন ক্ৰিকেটাৰ অতীন্দ্ৰনাথ ঠাকুৰলৈ ৫০,০০০ টকাকৈ অৰ্থ সাহাৰ্য্য আগবঢ়াইছে অসম ক্রিকেটৰ অভিভাৱক সন্থাটোৱে।

উল্লেখযোগ্য যে, তিতাবৰৰ প্ৰাক্তন ক্ৰিকেটাৰ তথা ক্ৰীড়া সংগঠক আছিফ ইকবাল হুছেইন দীৰ্ঘদিন ধৰি জটিল ৰোগত আক্ৰান্ত হৈ মুম্বাইত চিকিৎসাধীন হৈ আছে। হুছেইন তিতাবৰ ক্ৰিকেট সন্থাৰ সৈতে দীৰ্ঘদিন ধৰি জড়িত হৈ থকাৰ লগতে ২০০৯ চনৰ পৰা সন্থাটোৰ সম্পাদকৰ দায়িত্বতো আছে।

হুছেইনৰ বাহিৰেও আন এগৰাকী প্ৰাক্তন ক্ৰিকেটাৰ তথা ক্ৰীড়া সংগঠক ডিব্ৰুগড়ৰ অতীন্দ্ৰনাথ ঠাকুৰো একেদৰে দীৰ্ঘদিন ধৰি চিকিৎসাধীন হৈ আছে। উল্লেখযোগ্য যে অতীন্দ্ৰনাথ ঠাকুৰে কোচবিহাৰ ট্ৰফী আৰু চি কে নাইডু ট্ৰফীত অসম দলক প্ৰতিনিধিত্ব কৰিছিল।

দুয়োগৰাকী চিকিৎসাধীন প্ৰাক্তন খেলুৱৈলৈ এচিএ’ই অৰ্থ সাহাৰ্য্য আগবঢ়োৱা কাৰ্যক আদৰণী জনাইছে
অসম প্ৰবীণ ক্ৰিকেট সন্থাই।