Monday, July 4, 2022
HomeNewsআন্তঃৰাষ্ট্ৰীয় আৰ্চাৰ দীপিকা কুমাৰীৰ ক্ৰীড়া জীৱন গাঁথা

আন্তঃৰাষ্ট্ৰীয় আৰ্চাৰ দীপিকা কুমাৰীৰ ক্ৰীড়া জীৱন গাঁথা

অলিম্পিয়া প্ৰতিবেদন

লক্ষ্য যদি স্থিৰ হয় আৰু মনত থাকে প্ৰবল আত্মবিশ্বাস তেতিয়া দৰিদ্ৰতা কিয় আন কোনো কাৰকেই বাধা হ’ব নোৱাৰে — এই কথাকেই প্ৰমাণ কৰি আজি দেশৰ লগতে বিশ্বৰ ক্রীড়াক্ষেত্ৰত এক সুকীয়া আসন দখল কৰিবলৈ সক্ষম হোৱা এগৰাকী খেলুৱৈ । নাম তেওঁৰ দীপিকা কুমাৰী । আৰ্চাৰীৰ ক্ষেত্ৰখনত এতিয়ালৈকে ৩৭ তাৰো অধিক আন্তঃৰাষ্ট্ৰীয় পদক লাভ কৰিবলৈ সক্ষম হোৱা দীপিকা বৰ্তমান বিশ্বৰ নাম্বাৰ-১ আৰ্চাৰী খেলুৱৈ । জীৱনতো বহুতো ঘাত-প্ৰতিঘাতৰ মাজেৰে অতিক্ৰম কৰি এটা সময়ত পদ্মশ্ৰী আৰু অৰ্জুন বঁটাৰে সন্মানিত এইগৰাকী আৰ্চাৰী খেলুৱৈৰ জীৱন গাঁথা আন দহগৰাকী খেলুৱৈৰ বাবে প্ৰেৰণাৰ উৎস ।
ঝাৰখণ্ডৰ এখন সৰু গাঁও ৰাতু চাট্টিত ১৯৯৪ চনৰ ১৩ জুনত জন্মলাভ কৰা দীপিকাৰ পিতৃ আছিল এজন ৰিক্সাচালক । মাহে ৭০০ টকা উপাৰ্জনেৰে পৰিয়ালটোৱে দুবেলা দুখাজ খাদ্যৰ বাবেও যথেষ্ট সংগ্ৰাম কৰিবলগা হৈছিল । সৰুতে প্ৰায়ে গছৰ আমক লক্ষ্য কৰি দীপিকাই শিলগুটি নিক্ষেপ কৰিছিল , য’ত কেতিয়াও লক্ষ্যচ্যুত হোৱা নাছিল দীপিকাৰ । লাহে লাহে আৰ্চাৰীৰ প্ৰতি আগ্ৰহ বাঢ়ি আহিছিল দীপিকাৰ । ঘৰতেই বাঁহেৰে ধনুকাঁড় সাজি অনুশীলন আৰম্ভ কৰিছিল দীপিকাই । এনেদৰেই এটা সময়ত দীপিকাই খাৰছাৱানৰ অৰ্জুন আৰ্চাৰী একেডেমীত প্ৰশিক্ষণ আৰম্ভ কৰে । দীপিকাৰ ভাষ্য, ” প্ৰথমাৱস্থাত মই অৰ্জুন আৰ্চাৰী একাডেমীত নামভৰ্তি কৰাৰ এটাই কাৰণ আছিল সেয়া হৈছে তাত যোগান ধৰা বিনামূলীয়া খাদ্য আৰু থকাৰ ব্যৱস্থাৰ বাবে । মোৰ পৰিয়ালটোৱে দিনটোৰ এসাজৰ বাবে যথেষ্ট সংগ্ৰাম কৰিবলগা হৈছিল । সেয়ে মই ভাবিছিলো যে মই আঁতৰিলেও পৰিয়ালটোৰ পৰা অকণমান বোজা আঁতৰিব । কিয়নো ঘৰখনত খাবলৈ আৰু বহুকেইজন আছিল ।” সঁচাকৈয়ে হৃদয় বিদাৰক ! কিমান অভাৱত থাকিলে এগৰাকী ব্যক্তিয়ে এনেদৰে ভাবিবলৈ বাধ্য হয় ! একেডেমীখনে প্ৰথমে তেওঁক ৰিজেক্ট কৰিছিল কিন্তু পিছলৈ যেতিয়া দীপিকাই নিজক প্ৰমাণ কৰি দেখুৱাবৰ বাবে ৩ মাহ সময় বিচাৰিলে তেতিয়া তেওঁলোক মান্তি হ’ল ।
এনেদৰেই আৰম্ভণি হ’ল দীপিকাৰ আৰ্চাৰী যাত্ৰা । তেওঁ বিভিন্ন ছাব জুনিয়ৰ প্ৰতিযোগিতাসমূহত ভাগ ল’বলৈ আৰম্ভ কৰিলে । এনেদৰে এদিন দীপিকাৰ ওপৰত চকু পৰিল টাটা একেডেমী জুনিয়ৰ টীমৰ প্ৰশিক্ষক ধৰ্মেন্দ্ৰৰ আৰু তাৰ পিছতেই সলনি হ’ল দীপিকাৰ জীৱন । দীপিকাৰ ভাষ্য, “জামচেদপুৰৰ জে আৰ দি স্পৰ্টছ কম্প্লেক্সত ট্ৰেইনিং আৰম্ভ কৰাটো মোৰ বাবে এটা সপোনসদৃশ । ইয়াৰ আগতে মই কেতিয়াও এনে হোষ্টেলত থাকি পোৱা নাছিলো– য’ত মহিলাৰ বাবেও টইলেটৰ ব্যৱস্থা আছে । ইমানবোৰ সুবিধা মই আগতে কেতিয়াও পোৱা নাছিলো । মই ঈশ্বৰক প্ৰাৰ্থনা কৰিছিলো যাতে চিৰদিনৰ বাবে ইয়াত থাকিব পাৰো ।” প্ৰথমবাৰৰ বাবে দীপিকাই বাঁহৰ ধনুকাঁড় এৰি ৰিকাৰ্ভ ধনু আৰু কাঁড় ব্যৱহাৰ কৰিবলৈ শিকিছিল । লাহে লাহে নিপুণ হৈ উঠিছিল দীপিকা আৰু ইয়াৰ লগে লগে নেচনেল জুনিয়ৰ টুৰ্ণামেণ্টছসমূহত নিজ পাৰদৰ্শিতা দেখুৱাবলৈ ধৰিলে । ছিনিয়ৰ নেচনেল চেম্পিয়ন হবলৈ সক্ষম হোৱা দীপিকা হৈছে ভাৰতৰ প্ৰথমগৰাকী ছাব জুনিয়ৰ আৰ্চাৰ । আন্তঃৰাষ্ট্রীয় পৰ্যায়ত দীপিকাৰ অভিষেক মেচ আছিল ২০০৬ চনৰ মেক্সিকত হোৱা আৰ্চাৰী ৱৰ্ল্ড কাপ য’ত তেওঁ পল্টন হেনছা টাইটেল লাভ কৰা ভাৰতৰ দ্বিতীয়গৰাকী আৰ্চাৰৰ সন্মান লাভ কৰে । ২০০৯ চনত ইউ এছ এ ৰ উতাহত অনুষ্ঠিত ৱৰ্ল্ড আৰ্চাৰী চেম্পিয়নশ্বিপত স্বৰ্ণ পদক অৰ্জন কৰে । ২০১০ চনত দিল্লীত হোৱা কমনৱেলথ গেমছত দুটাকৈ স্বৰ্ণ পদক আজুৰি আনিবলৈ সক্ষম হয় । ২০১২ চনত আন্তল্যত অনুষ্ঠিত আৰ্চাৰী ৱৰ্ল্ড কাপত স্বৰ্ণ পদক অৰ্জন কৰে । ২০১৩ চনত এচিয়ান গেমছত ব্ৰঞ্জৰ পদক দখল কৰাৰ লগতে অন্তল্য আৰ্চাৰী ৱৰ্ল্ড কাপতো স্বৰ্ণ পদক দখল কৰে । ইয়াৰ পাছত ২০১৬ চনৰ ৰিও অলিম্পিকত অংশগ্ৰহণ কৰাৰ আগলৈ দীপিকাই ভালেসংখ্যক ৰূপৰ পদকৰ লগতে ব্ৰঞ্জৰ পদক লাভ কৰে । ইমানবোৰ পদক অৰ্জনৰ উপৰি শেহতীয়াকৈ চর্চালৈ অহাৰ অন্য এটা কাৰণ হৈছে পেৰিচত হোৱা আৰ্চাৰী ৱৰ্ল্ড কাপত দীপিকাই এদিনতেই ভাৰতক তিনিটা সোণৰ পদক উপহাৰ দিবলৈ সক্ষম হয় । ২০২১ লৈ দীপিকাই মুঠ ৬ টা সোণৰ পদক ভাৰতক দিবলৈ সক্ষম হৈছে । ২০১৯ ,চনত দীপিকাই এছিয়া কনণ্টিনেণ্টেল কোৱালিফিকেচন টুৰ্ণামেণ্টত সোণৰ পদক দখল কৰি ২০২১ ৰ টকীও অলিম্পিকলৈ যোগ্যতা অর্জন কৰে ।
আজিৰ হেজাৰগৰাকী তৰুণীৰ আদৰ্শ হৈ ৰ’ব দীপিকা। ক্ৰীড়াপ্ৰেমীয়ে কামনা কৰিব দীপিকাৰ আৰ্চাৰীৰ সৈতে এই যাত্ৰা সুদূৰপ্ৰসাৰী হওঁক।

- Advertisment -
RELATED ARTICLES

LEAVE A REPLY

Please enter your comment!
Please enter your name here

4 × one =

- Advertisment -

Magazine

তেজপুৰ ক্লাব বেডমিণ্টনত ঢলা শদিয়া ক্লাব চেম্পিয়ন; ত্ৰিভায়ান ৰাজ...

0
অলিম্পিয়া প্ৰতিবেদন সোমবাৰে বিজিত শইকীয়া সোঁৱৰণী ইনড'ৰ ষ্টেডিয়ামত সোমবাৰে তেজপুৰ জিলা ক্ৰীড়া সন্থাৰ উদ্যোগত অনুষ্ঠিত হৈ যায় তাৰিণী ভূঞা সোঁৱৰণী...

Olympia March 2020

0

Olympia January 2020

0

Most Popular

Archives list

Recent Comments